Lieze Stassen – Biog
Lieze Stassen se lewensreis van myndorp na treindorp en uiteindelik
die stad se liggies het begin op 2 Mei 1963 in die Namakwaland – Nababeep –
waar sy gebore is. Sy begin haar skoolopleiding (1970) in die Karoo – De Aar –
en voltooi haar matriek op Worcester by Worcester Gimnasium.(1981) Musiek was
nog altyd die een onafskeidbare deel van haar lewe. Reeds as ses-jarige het sy
solo gesing in die kerk tydens ‘n Kersuitvoering. Op ‘n vroeë ouderdom het sy klavieronderrig ontvang
en het ook Musiek as vak gehad tot in Matriek met klavier as hoofvak
Direk na matriek skryf sy haar in by Babs Laker se Akademie van Drama
Kuns waar sy buitemuurs spraak en drama studeer en begin voltyds werk by
LESERSKRING(NASIONALE PERS). Sy ontmoet haar eerste eggenoot. Uit haar huwelik
word ‘n dogter en seun gebore – Simone en Alexander.
SIMONE & ALEXANDER - 2002
Alhoewel sy eintlik gedink het sy gaan aktrise word, het Lieze tydens
haar studies by die ADK dadelik betrokke geraak by musiekteater.Een van die
dramaskool se mees suksesvolle kabarette – AFRIKANERS IS PLESIERIG –onder die
spelleiding van GERARD SCHOLTZ was een van die vele produksies waarin sy
betrokke was en begin naam maak het vir haarself. Dis ook by die dramaskool
waar haar en Ralph Rabie (Johannes Kerkorrel) se paaie gekruis het en ‘n hegte
vriendskap ontstaan het.Hulle het ook albei vir NASIONALE PERS gewerk, Ralph as
joernalis by DIE BURGER se nagkantoor en Lieze as musiekaankoper By LESERSKRING.
LIEZE STASSEN & RALPH RABE
Voltyds werk, ma speel, buitemuurse studies sowel as die afskop van
‘n sololoopbaan raak egter ‘n handvol en sy besluit om voltyds aan ‘n
musiekloopbaan te werk en bedank haar voltydse werk. Gedurende 1989 sneuwel
Stassen se huwelik en verhuis sy en haar twee kinders na Johannesburg waar sy
fokus op haar musiekloopbaan.Sy doen vele eenvrouvertonings, teaterproduksies,
kunstefeeste en werk solo sowel as saam met groot name soos LAURIKA RAUCH en
COENIE DE VILLIERS.
Gedurende 1994 roep haar verlange na die Kaap haar terug Kaap toe en
beland sy dadelik op die filmstel van WOESTYNBLOM, televisiereeks deur JOHAN
VAN JAARSVELD .Hierdie was ‘n groot persoonlike mylpaal vir Lieze en beskou sy
dit as haar terugkeer na haar wortels. Die reeks was verfilm in Touwsriver –
nog n treindorp waar sy skoolgegaan het - waar haar Pa skoolhoof en burgemeester
was en haar ma musiekonderwyseres .Dit is ook tydens die opnames van die
klankbaan vir WOESTYNBLOM, geskryf deur NEILL SOLOMON, dat Lieze besef haar
hart lê by haar moedertaal.Die klankbaan van WOESTYNBLOM palm ook ‘n SAMA in
vir die beste klankbaan vir ‘n televisiereeks.
In 1995 kry sy ‘n borg vir haar debuut album en begin werk aan
material. Opnames vir hierdie Cd begin in Januarie 1996 en 1997 wen sy die SAMA
toekenning vir die beste kontemporere album , THULA, in Afrikaans.
n Verdere twee mini albums XV MEN/BOKKIE en SKY sien in die
opvolgende agtien maan die lig.Gedurende 2000 bou Lieze haar eie klankateljee
en begin skryf en werk aan ‘n nuwe album AENGEL wat sy in 2001 opneem en beplan
vir vrystelling 2002.Lieze het self die hele produksie van die album behartig en‘n nuwe klank in Suid-Afrikanse musiek begin soek.
Hierna het Lieze se pad ‘n dramatiese draai geneem in 2003 toe haar
seun, Alexander,toe in matriek, opslag sterf in ‘n motorfietsongeluk. Sy was
gebroke en het gesweer sy sou nooit weer sing of aan ‘n musiekinstrument raak
nie. Daar was geleenthede daarna toe sy ‘n halfhartige poging aangewend het om
weer op te tree op die aanmoediging van familie en vriende, maar dit was rampspoedig.
Haar hart was nie in haar werk nie en sy besluit om haar totaal te onttrek van
die musiekbedryf en ook van die samelewing.
Vir nog 5 jaar bly sy aan in die
Kaap en hou haar besig met ‘n besigheid waarin sy ‘n venootskap gehad het,
totdat sy daar ook besluit om finaal die deure toe te maak en weg te gaan uit
die Kaap uit. Sy trek sak en pak Pretoria toe en woon by vriende en familie
terwyl sy haar voete probeer vind en die ewige vrede gaan soek. Gedurende
hierdie swerwersjare het sy ontdek dat sy aanklank vind by kinders en
musiekonderrig en het sy begin privaat sang-, kitaar- en klavierlesse gee.
Sy ontmoet haar huidige man, Michael Kruger, en hulle trou in
2010. In 2011 trek hulle na ‘n huis op n perdeplaas en Lieze bevind haar
skielik in die wonderwêreld van perde. Dis hier waar sy uiteindelik vrede en
berusting vind in die lewe en die dood, haar rouproses tot ‘n einde kom en sy
weer haar stem en musiek herontdek. Sy ondergaan ook n geestelike ommekeer en
haar nuwe album, MY HART IS JOU GEBED, raak gebore tussen die hemel en die
aarde en die genesende teenwoordigheid van perde. Sy vind sodoende ook weer
haar geloof in haar God en in Sy onbegryplike genade en liefde.
MY HART IS JOU GEBED is ‘n album gestroop van alle musikale
tierlantyntjies of foefies.Dit is ‘n album wat fokus op die stem en die lied – 'the singer and the song'. Stassen het self geskryf , asook nou saamgewerk met
jong,opkomende digters en al die toonsettings van hierdie gedigte gedoen. Elke
gedig is met groot omsigtigheid gekies vir hierdie album en vertel elkeen so ‘n
stukkie van haar eie verhaal.Sy het ook self die hele produksie,verwerkings en
instrumentasie hanteer en opgeneem by VIC VAN DER WATT van SOUNDWORX, ook ‘n
jarelange vriend.
Lieze woon tans in Pretoria op ‘n plot buite die dorp. Tussen die
perde, donkies en plaasdiere werk sy aan vele projekte, o.a opdrag albums in
oorleg met digters en uitgewers.
MY HART IS JOU GEBED IS NOU BESKIKBAAR
No comments:
Post a Comment